मुंबई:
बोरीवली पूर्व येथील ‘बेस्ट’ बस आगाराच्या आरक्षित भूखंडावरील अनधिकृत अतिक्रमणाबाबत सर्वोच्च न्यायालयाने महापालिकेला (BMC) फटकारल्यानंतर पालिका प्रशासनाने मोठी प्रशासकीय कारवाई केली आहे. न्यायालयाने दाखवलेल्या तीव्र नाराजीनंतर पालिकेच्या मुख्य विधी अधिकारी ॲड. कोमल पंजाबी यांना तडकाफडकी सक्तीच्या रजेवर पाठवण्यात आले आहे.
सर्वोच्च न्यायालयाच्या आदेशानंतरही अतिक्रमणांवर वेळेत कारवाई न करणे आणि न्यायालयात अर्धवट माहिती सादर केल्याचा ठपका विधी विभागावर ठेवण्यात आला आहे. न्यायालयाच्या या तणख्यानंतर महापालिका प्रशासनाने तात्काळ पावले उचलत २७ हून अधिक अनधिकृत बांधकामांवर बुलडोझर चालवून भूखंड मोकळा केला.
तसेच, प्रशासकीय कामकाज ठप्प होऊ नये म्हणून कोमल पंजाबी यांच्याकडील मुख्य विधी अधिकारी पदाचा अतिरिक्त पदभार संयुक्त कायदा अधिकारी सुखश्री मिलिंद मोडले यांच्याकडे सोपवण्यात आला आहे. याशिवाय, आर-मध्य (R-Central) विभागाचे सहायक आयुक्त डॉ. प्रफुल्ल तांबे यांच्यासह विधी खात्यातील इतर जबाबदार अधिकाऱ्यांना महापालिका प्रशासनाने ‘कारणे दाखवा’ नोटीस बजावली आहे.
न्यायालयाच्या कठोर भूमिकेनंतर पालिकेने ही तात्काळ कारवाई केली असून, दोषी अधिकाऱ्यांवर कडक पावले उचलण्याचा इशारा प्रशासनाने दिला आहे.
