बृहन्मुंबई महानगरपालिकेच्या ‘पेडेस्ट्रियन First’ अभियानांतर्गत शामलदास गांधी मार्ग (प्रिन्सेस स्ट्रीट) उड्डाणपुलाखालील परिसराचा कायापालट करण्यात आला आहे. या सुशोभित परिसराचे आणि नवीन उद्यानाचे लोकार्पण महाराष्ट्र विधानसभेचे अध्यक्ष राहुल नार्वेकर यांच्या हस्ते ३ नोव्हेंबर २०२६ रोजी पार पडले.
या सोहळ्याला सी व डी प्रभाग समिती अध्यक्ष आकाश पुरोहित, स्थानिक नगरसेविका रिटा मकवाना, परिमंडळ-१ च्या उपायुक्त चंदा जाधव आणि सी विभागाचे सहायक आयुक्त सुनील माने यांची प्रमुख उपस्थिती होती. तसेच हे अभियान महानगरपालिका आयुक्त अश्विनी भिडे यांच्या मार्गदर्शनाखाली राबविण्यात आले.
यापूर्वी ई आणि एच रोड परिसरात सार्वजनिक शौचालय व इतर अडथळ्यांमुळे पादचाऱ्यांना सुरक्षित मार्ग नव्हता. महापालिकेने अडथळे हटवून ई रोडवर १५० मीटरचा नवीन पदपथ आणि एच रोडवर १०० मीटरचा वळणदार पादचारी मार्ग तयार केला आहे.
या प्रकल्पात ई रोडलगतच्या भिंतीवर ४०० चौरस मीटरचे 3D भित्तिचित्र, कमी सूर्यप्रकाशात टिकणाऱ्या वनस्पतींचे उद्यान, स्वयंचलित ठिबक सिंचन प्रणाली, आकर्षक विद्युत खांब आणि बहुउद्देशीय देखरेख कक्ष उभारण्यात आला आहे. स्थानिक नागरिकांच्या सूचनांनुसार झालेल्या या कामामुळे हा दुर्लक्षित परिसर आता सुरक्षित व सुंदर विरंगुळा केंद्र बनला आहे.
