मुंबई:
मुंबई विमानतळाजवळील कथित अनधिकृत मशिदीविरोधात आक्रमक भूमिका घेतल्यानंतर, पोलिसांनी भाजप नेते किरीट सोमैया आणि त्यांच्या अनेक कार्यकर्त्यांना ताब्यात घेतले आहे. दोन दिवसांपूर्वीच त्यांनी प्रशासनाला इशारा दिला होता. त्यानुसार, सोमैया आज हातात हातोडे घेतलेल्या कार्यकर्त्यांसह विमानतळ परिसरात दाखल झाले होते.
मशिदीवरील बेकायदेशीर बांधकामावर तातडीने हातोडा चालवून ती पाडण्यात यावी, अशी त्यांची आक्रमक मागणी होती. मात्र, कायदा व सुव्यवस्था अबाधित राखण्यासाठी आणि संभाव्य तणाव टाळण्यासाठी पोलिसांनी त्वरित पावले उचलली. आंदोलक कार्यकर्त्यांसह किरीट सोमैया यांना घटनास्थळावरून ताब्यात घेत पोलीस ठाण्यात नेण्यात आले. या कारवाईमुळे विमानतळ परिसरात काही काळ तणावाचे वातावरण निर्माण झाले होते. प्रशासनाकडून या प्रकरणाची सखोल चौकशी सुरू असून पोलिसांचा बंदोबस्त वाढवण्यात आला आहे
