मुंबई:
बृहन्मुंबई महानगरपालिकेच्या ‘एस’ विभागातील मोरारजी नगर येथील जुन्या व नवीन भुयारी मार्गांचे रुंदीकरण यशस्वीपणे पूर्ण करून वर्षांनुवर्षे असलेली वाहतूक कोंडी दूर करणाऱ्या तत्कालीन अभियंत्यांच्या उल्लेखनीय कार्याची महापालिका आयुक्त मा. श्रीमती अश्विनी भिडे यांनी लेखी प्रशंसापत्राद्वारे विशेष प्रशंसा केली आहे.
कार्यकारी अभियंता सुभाष शिंदे, सहायक अभियंता अनिस अयुब खान, दुय्यम अभियंता महेंद्र दळवी व कनिष्ठ अभियंता संदीप राणे यांनी अत्यंत मर्यादित जागा व तांत्रिक अडचणींवर मात करत हे आव्हानात्मक काम पार पाडले. अभियंता अनिस अयुब खान यांनी यामध्ये पुढाकार घेतला होता. या प्रकल्पामुळे महापालिकेचे विद्युत खर्चापोटी ३४.७० लाख रुपये वाचले, तसेच भविष्यात उड्डाणपूल उभारण्याची गरज टळल्याने मोठा भांडवली खर्चही वाचला. मार्गाच्या रुंदीकरणामुळे परिसरातील पर्जन्यजल निचरा, पादचारी सुविधा आणि केबल डक्टची उत्तम व्यवस्था झाली असून नागरिकांना मोठा दिलासा मिळाला आहे.
या कर्तृत्वाबद्दल म्युनिसिपल इंजिनिअर्स असोसिएशनचे अध्यक्ष इंजि. टी. व्ही. शाह व कार्याध्यक्ष इंजि. रमेश भुतेकर देशमुख यांनी सर्व अभियंत्यांचे अभिनंदन केले आहे. तसेच अशा गुणवंत अभियंत्यांसाठी विशेष पुरस्कार योजना राबवण्याची मागणीही संघटनेने केली आहे.
