पंढरपूर: माळशिरस तालुक्यातील गिरझणी गावात माणुसकीला काळीमा फासणारी धक्कादायक घटना समोर आली. विवाहित महिलेचा अंघोळीचा व्हिडिओ चोरून चित्रित करून, तो सोशल मीडियावर व्हायरल करण्याची धमकी देत दोन वर्षे अत्याचार केल्याचा प्रकार उघडकीस आला. या प्रकरणी गिरझणी ग्रामपंचायतीचा शिपाई उमेश जगन्नाथ साठे याला अकलूज पोलिसांनी बेड्या ठोकल्या.
माहितीनुसार, आरोपी साठे याने पीडित महिलेचा अंघोळ करतानाचा व्हिडिओ मोबाईलमध्ये चोरून काढला. या व्हिडिओच्या भीतीने तिला ब्लॅकमेल करून दोन वर्षांपासून सतत अत्याचार केले. याच काळात त्याने आणखी अश्लील व्हिडिओ काढून तिची बदनामी करण्याच्या धमक्या दिल्या. पीडितेच्या पतीला संशय आल्यावर तिने रडत सर्व कथा सांगितली आणि दोघांनी अकलूज पोलीस स्टेशनला फिर्याद दिली.
पोलिसांनी तत्काळ कारवाई करून आरोपीला अटक केली. न्यायालयाने त्याला २७ एप्रिलपर्यंत पोलीस कोठडी सुनावली. या घटनेमुळे माळशिरस तालुक्यात संतापाची लाट उसळली असून, महिलांच्या सुरक्षिततेचा मुद्दा पुढे आला आहे.
