माझगावच्या मोरया आगमन मिरवणुकीवर अंडी फेकणारा भायखळा पोलिसांच्या जाळ्यात; फटाक्यांच्या धुरामुळे संतापातून कृत्य केल्याची कबुली

ByMumbai Jansatta


मुंबई:
प्रसिद्ध ‘माझगावचा मोरया’ गणपतीच्या आगमन मिरवणुकीवर अंडी फेकल्याच्या धक्कादायक घटनेचा भायखळा पोलिसांनी तातडीने छडा लावला आहे. या प्रकरणी पोलिसांनी २४ तासांच्या आत दानिश शेर खान (वय २२) या तरुणाला अटक केली आहे.
रविवार, २३ ऑगस्ट रोजी माझगावचा मोरया गणपतीची आगमन मिरवणूक मंडपापासून अवघ्या ३०-४० मीटर अंतरावर आली असताना शेजारच्या ‘कॉन्टिनेन्टल हाईट्स’ या इमारतीवरून मिरवणुकीवर अंडी फेकण्यात आली. या प्रकारामुळे गणेशभक्तांमध्ये तीव्र संताप पसरला होता आणि परिसरात तणावाचे वातावरण निर्माण झाले होते. परिस्थितीचे गांभीर्य ओळखून पोलिसांनी तात्काळ घटनास्थळी धाव घेत कायदा व सुव्यवस्था राखली.
इमारतींचे सीसीटीव्ही फुटेज आणि मिळालेल्या माहितीच्या आधारे भायखळा पोलिसांनी संशयित आरोपी दानिश खान याला ताब्यात घेतले. चौकशीदरम्यान आरोपीने गुन्ह्याची कबुली दिली. मिरवणुकीदरम्यान फुटणाऱ्या फटाक्यांच्या धुरामुळे डोळ्यांची तीव्र जळजळ होऊन त्रास झाल्याने, रागाच्या भरात डिलिव्हरीसाठी जवळ असलेली अंडी इमारतीवरून फेकल्याचे त्याने पोलिसांना सांगितले.
भायखळा पोलिसांनी आरोपीविरुद्ध धार्मिक भावना दुखावणे आणि सामाजिक समरसता बिघडवल्याप्रकरणी भारतीय न्याय संहितेच्या (BNS) कलम २९९ आणि १९६ अंतर्गत गुन्हा दाखल केला आहे. सध्या परिसरातील कायदा व सुव्यवस्था अबाधित असून पोलीस पुढील तपास करत आहेत.

Similar Posts