फोर्टमधील मनीष मार्केट परिसरावर पालिकेचा हातोडा; ९२ अनधिकृत स्टॉल्सवर धडक कारवाई

मुंबई:
दक्षिण मुंबईतील अत्यंत गजबजलेल्या फोर्ट भागातील मनीष मार्केट, साबू सिद्धीक रोड आणि मुसाफिरखाना परिसरात मुंबई महानगरपालिकेच्या ‘A’ वॉर्ड प्रशासनाने धडक अतिक्रमणविरोधी कारवाई केली. या मोहिमेत फूटपाथ व रस्त्यांवर बेकायदेशीरपणे थाटलेले तब्बल ९२ अनधिकृत स्टॉल्स आणि तात्पुरती शेड्स हटवून परिसरातील रस्ते मोकळे करण्यात आले.
महापालिकेच्या ‘पेडेस्ट्रियन फर्स्ट’ (पादचारी प्रथम) धोरणांतर्गत ही कारवाई करण्यात आली. मनीष मार्केट आणि आसपासच्या परिसरात वर्षानुवर्षे अनधिकृत पथारी व्यावसायिक आणि स्टॉलधारकांनी फूटपाथवर अतिक्रमण केले होते. यामुळे पादचाऱ्यांना चालणे मुश्कील झाले होतेच, शिवाय वाहनकोंडीचा सामनाही करावा लागत होता. स्थानिक नागरिक आणि वाहनधारकांकडून याविरोधात सातत्याने तक्रारी येत होत्या.
बुधवारी सकाळी पालिका अधिकारी, अतिक्रमण निर्मूलन पथक आणि पोलिसांच्या ताफ्यासह ही कारवाई सुरू करण्यात आली. अचानक झालेल्या या धडक कारवाईमुळे परिसरातील बेकायदेशीर व्यापाऱ्यांची चांगलीच धांदल उडाली. पालिकेने जेसीबीच्या साह्याने अनधिकृत शेड्स, लोखंडी सांगाडे आणि स्टॉल्स तोडून सर्व सामान जप्त केले.
परिसरात पुन्हा अतिक्रमण होऊ नये यासाठी पालिकेकडून विशेष दक्षता पथक तैनात करण्यात आले आहे. बेकायदेशीर अतिक्रमणांवर यापुढेही अशीच कठोर कारवाई सुरूच राहील, असा इशारा पालिकेच्या वतीने देण्यात आला आहे.