बेळगाव/सध्याबेळगावमध्ये ऊसदरवाढ आंदोलन चिघळलं आहे. या आंदोलनाला आता हिंसक वळण लागलं आहे. बेळगाव जिल्ह्यातील गुरलापूर क्रॉस येथे गेल्या काही दिवसांपासून याठिकाणी हे आंदोलन सुरु आहे. कर्नाटकातही ऊसदराचा प्रश्न गंभीर आहे. त्यामुळे याठिकाणच्या शेतकऱ्यांनी मोठं आंदोलन उभा केलं आहे. गेल्या काही दिवसांपासून कर्नाटकातील शेतकरी संघटना व शेतकऱ्यांकडून ऊसाला प्रतिटन चार हजारपेक्षा जास्त भाव मिळावा यामागणीसाठी हे आंदोलन करत आहे.ठिकठिकाणी हायवेवरही रास्तारोको आंदोलन केले जात आहे. पण, सरकारकडून अद्यापही या आंदोलनाची दखल घेतली जात नाहीये, असा आरोप आंदोलक शेतकऱ्यांनी केला आहे. त्याचमुळे आज हा उद्रेक या आंदोलनात झाल्याची माहिती मिळते आहे. बेळगावच्या अलिकडे असणाऱ्या हत्तारगी टोलनाक्यावर यावेळी गोंधळ पाहायला मिळाला आहे.दुपारच्या सुमारास हत्तारगी टोलनाक्यावर शेतकरी एकत्र पोहोचले आणि या आंदोलकांनी यावेळी टोलनाक्याची तोडफोड केली तसेच याठिकाणी दगडफेकही केली त्यामुळे पोलिसांनी याठिकाणी पोहोचत आंदोलकांवर कारवाई केली आहे. परंतू आंदोलकांनी पोलिसांनाही न जुमानता रस्त्यावरील वाहन व पोलिसांवरही दगडफेक केली. त्यामुळे शेतकरी मोठ्या प्रमाणावर आक्रमक झाल्याची स्थिती सध्या बेळगावमध्ये तयार झाली आहे. या दगडफेकीमध्ये तीन ते चारजण जखमी झाल्याचीही माहिती आहे.
दरम्यान, या आंदोलनाचे नेतृत्व शशिकांत प्रसंगी व चिनप्पा पुजारी हे दोघेजण करत आहेत. या आंदोलनावर तोडगा काढण्यासाठी राज्य सरकारने कायदामंत्री एच. के. पाटील यांना चर्चेसाठी आंदोलनस्थळावर पाठवलेही होते, पण त्याचा काही उपयोग झाला नाही. यावेळी मंत्री पाटील यांच्या गाडीसमोर आंदोलक शेतकऱ्यांनी झोपून आंदोलन केले होते. याहीवेळी पोलिसांनी हस्तक्षेप केला होता. शेतकऱ्यांना आंदोलन स्थळावरुन दूर नेत त्यांनी वातावरण थंड करण्याचा प्रयत्न केला, पण यावेळी जवळपास तासभर शाब्दिक चकमक पाहायला मिळाली होती.
त्यामुळे शेतकऱ्यांच्या या मागणीवर कोणताही तोडगा न निघाल्यामुळे शेतकऱ्यांनी राष्ट्रीय महामार्ग रोखण्याचा इशारा दिलेला होता. मागणीवर सरकार विचार करत नसल्या कारणानेही शेतकऱ्यांमध्ये संतापाचं वातावरण निर्माण झालेलं आहे.
