‘
दिव्यांग, मास्टर्स, महिलांच्या शरीरसौष्ठवासह फिजीक स्पोर्ट्सचाही समावेश
मुंबई, दि.२२ (क्री.प्र.)- उदयोन्मुख आणि ज्यूनियर शरीरसौष्ठवपटूंच्या हक्काचे व्यासपीठ असलेली ‘ज्यूनियर मुंबई श्री’ उद्या रविवारी २३ फेब्रूवारीला मालाड पूर्वेला कासम बागेत असलेल्या दीनदयाल उपाध्याय मैदानावर आयोजित केली जाणार आहे. या स्पर्धेत सुमारे १००-१२० खेळाडू आपल्या नव्या कोर्या शरीरयष्टीला लोकांसमोर फुगवणार असून या स्पर्धेतूनच मुंबई शरीरसौष्ठवाचे भवितव्य पाहायला मिळेल. या स्पर्धेत आजच्या तरूणाईचा आवडता प्रकार असलेल्या फिजीक स्पोटर््स प्रकाराचा समावेश करण्यात आला आहे. त्यामुळे फिट असलेली तरूणाई वेगळ्या पोझेस मारताना दिसेलच पण या स्पर्धेबरोबर दिव्यांग, महिला आणि मास्टर्स शरीरसौष्ठवपटूंना प्रोत्साहन देण्यासाठी त्यांच्या गटाच्या मुंबई श्रीचे आयोजनही करण्यात आले आहे.
शरीरसौष्ठव खेळाची बालवाडी असलेल्या स्पर्धेसाठी मुंबईकर ज्यूनियर खेळाडू गेले तीन-चार महिने जोरदार व्यायाम करीत आहेत. या स्पर्धेत आपल्या फार मोठे खेळाडू पाहण्याची संधी नसली तरी सहभागी स्पर्धक भविष्यात देशाचे प्रतिनिधीत्व करताना दिसतील असा विश्वास बृहन्मुंबई शरीरसौष्ठव संघटनेचे (जीबीबीबीए) अध्यक्ष अजय खानविलकर यांनी व्यक्त केला. ही स्पर्धा दोन्ही संघटनांच्या संयुक्त आयोजनाखाली रंगणार असून जय वरदानी ट्रस्टच्या पुढाकाराने एक लाखांपेक्षा अधिक रोख बक्षीसांचा वर्षाव विजेत्यांवर केला जाणार आहे. एकंदर सहा गटांच्या या स्पर्धेचा विजेता १५ हजार रूपयांच्या रोख पुरस्काराचा मानकरी ठरेल, अशीही माहिती खानविलकर यांनी दिली.
ज्यूनियर खेळाडूंची कसून तपासणी
वय चोरून खेळणार्या शरीरसौष्ठवपटूंना रोखण्यासाठी संघटनेने ज्यूनियर मुंबई श्री स्पर्धेत सहभागी होणार्या खेळाडूंना आपण २१ वर्षाखालील असल्याचे सिद्ध करावयास सांगितले. त्यामुळे काही घोडे खेळाडू अडचणीत आले होते. स्पर्धेच्या वजन आणि उंची तपासणीला खेळाडूंचे वयाचे दाखले म्हणून आधार कार्ड, पॅनकार्ड, पासपोर्ट आणि जन्माचा दाखला यापैकी कोणतेही दोन पुरावे मुळ पत्र आणि झेरॉक्स प्रतसह आणणे बंधनकारक होते. ज्यूनियर मुंबई श्री स्पर्धेत खेळणारा स्पर्धक १ जानेवारी २००३ सालानंतर जन्मलेला आहे तर मास्टर्स मुंबई श्री स्पर्धेत उतरणारा स्पर्धक १जानेवारी १९८५ पूर्वी जन्मलेला असणे गरजेचे असल्याचेही त्यांनी सांगितले. तरीही काही खेळाडूंनी वय चोरण्याचा प्रयत्न केला तर त्याला स्पर्धेला मुकावे लागेल, असे जीबीबीबीएचे सरचिटणीस राजेश सावंत यांनी स्पष्ट केले.
स्पर्धेच्या अधिक माहितीसाठी विशाल परब (८९२८३१३३०३), राम नलावडे (९८२०६६२९३२) सुनील शेगडे (९२२३३४८५६८), विजय झगडे (९९६७४६५०६३), किरण कुडाळकर (९८७०३०६१२७), राजेश निकम (९९६९३६९१०८) यांच्याशी संपर्क साधावा असे आवाहन करण्यात आले आहे.
