ठाणे – मुख्यमंत्र्यांवर केलेल्या आक्षेपार्ह पोस्ट वरून ठाण्यात शिंदे विरुद्ध ठाकरे गटात राडा झाला . यावेळी ठाकरे गटाच्या रोशनी शिंदे याना मारहाण करण्यात आली असून त्यांना ठाण्याच्या खाजगी रुग्णालयात उपचारार्थ दाखल करण्यात आले आहे . दरम्यान या घटनेची माहिती समजताच स्वतः उद्धव ठाकरे यांनी कुटूबियांसह रुग्णालयात जाऊन रोशनीच्या प्रकृतीची चौकशी केली तसेच उपमुख्यमंत्री फडणवीस यांच्यावर टीका करताना फडतूस गृहमंत्री असे महटले आहे त्यावर फडतूस कोण हे संपूर्ण महाराष्ट्राला माहिती आहे असा पलटवार फडणवीस यांनी केला तसेच या घटनेच्या निषेधार्थ उद्या ठाण्यात महामोर्चा काढण्यात येणार आहे.
एक फडतूस गृहमंत्री राज्याला मिळाला आहे. उपमुख्यमंत्रीपद मिळाले म्हणून लाचारी, लाळघोटेपणा करणारी व्यक्ती ‘फडणवीसी’ करत आहे, अशा कठोर शब्दांत शिवसेना ठाकरे गटाचे पक्षप्रमुख उद्धव ठाकरे यांनी राज्य सरकारवर घणाघाती टीका केली. सोमवारी रात्री, शिवसेना शिंदे गटाच्या महिला कार्यकर्त्यांनी ठाकरे गटाच्या रोशनी शिंदे यांना बेदम मारहाण केली. रोशनी शिंदे यांची आज रुग्णालयात ठाकरे कुटुंबीयांनी भेट घेतली.
रोशनी शिंदे यांची भेट घेतल्यानंतर उद्धव ठाकरे, खासदार राजन विचारे, ठाणे जिल्हाप्रमुख केदार दिघे यांनी पोलीस आयुक्तांची भेट घेण्याचा प्रयत्न केला. मात्र, आयुक्त कार्यालयात नसल्याने रोशनी शिंदे प्रकरणी चर्चा होऊ शकली नाही. त्यानंतर, उद्धव ठाकरे यांनी पत्रकार परिषद घेत आपला संताप व्यक्त केला. उद्धव यांनी म्हटले की, सर्वोच्च न्यायलयाने सरकार नपुंसक असल्याचे म्हटले होते. त्याची प्रचिती ठाण्यात आली. एका महिलेला मारहाण करण्यात आली. त्यावर कोणतीही कारवाई झाली नाही. इतकंच काय या पीडित महिलेची तक्रार दाखल करून घेतली नसल्याचे उद्धव यांनी म्हटले.
