मुंबई/अजित पवार यांच्या निधनानंतर राष्ट्रवादी काँग्रेस शरदचंद्र पवार पक्षाचे प्रमुख शरद पवार यांच्याकडे दोन्ही राष्ट्रवादी पक्षांची सूत्रे एकवटली, तर पुन्हा नवा पेचप्रसंग येऊ नये, यासाठी भाजपच्या दिल्लीतील नेतृत्वाने सुनेत्रा पवार यांच्याकडे राष्ट्रवादी काँग्रेसची धुरा सोपविण्याच्या निर्णयाला गती दिल्याचे खात्रीलायकरित्या समजते.
दोन्ही राष्ट्रवादी काँग्रेसच्या विलीनीकरणाची चर्चा सुरू झाली असताना, दुसरीकडे शरद पवार यांच्या राष्ट्रवादी काँग्रेसच्या नेतृत्वाकडून मात्र दिल्लीत वेगळ्या पद्धतीची चर्चा सुरू केल्याचे कळते. पक्षाच्या नऊ खासदारांचा पाठिंबा दिल्लीतील भाजपसाठी महत्त्वाचा आहे. त्यामुळे आम्ही राज्यात अजित पवार यांच्या राष्ट्रवादी काँग्रेससोबत जुळवून घेणार असलो, तरी आमच्या पक्षाची राष्ट्रीय लोकशाही आघाडी, अर्थात एनडीएमध्ये वेगळी नोंदणी करावी, असा आग्रह पक्षाच्या नेतृत्वाकडून धरण्यात आला होता. मात्र भाजपच्या शीर्षस्थ नेतृत्वाकडून हा आग्रह फेटाळून लावण्यात आला.तुम्हाला यायचेच असेल, तर अजित पवार यांच्या राष्ट्रवादी काँग्रेसच्या माध्यमातून केंद्रात आणि राज्यात या, असा निरोप देण्यात आला होता. आपला आग्रह मान्य होत नसल्याने पक्षाच्या नेतृत्वानेही काहीसे नाराज होतच अजित पवार यांच्यासोबत चर्चेच्या फेऱ्या सुरू केल्या होत्या.अजित पवार यांचे मंगळवारी अपघाती निधन झाल्यानंतर मात्र, पवार कुटुंबीयांचे प्रमुख म्हणून शरद पवार कदाचित या दोन्ही पक्षांचे नेतृत्व करतील, अशी शक्यता निर्माण झाल्यानंतर तातडीने दिल्लीवरून चक्रे फिरली. त्यानुसार राज्यातील भाजपच्या नेतृत्वाने तातडीने पक्षाची धुरा सहीसलामत अजित पवार यांच्या पत्नी सुनेत्रा पवार यांच्याकडेच जातील याची रणनीती आखलीभाजपच्या या खेळीने राष्ट्रवादी-शप पक्षाचे नेतृत्व अस्वस्थ झाल्याच्या चर्चेलाही आता तोंड फुटले आहे. शरद पवार यांनी शनिवारी बारामतीत प्रसारमाध्यमांच्या प्रतिनिधींशी संवाद साधताना सुनेत्रा पवार यांच्या शपथविधीबद्दल आपल्याला काहीच माहीत नसल्याचे सांगितले. स्वतः सुनेत्रा पवार यांनी कोणतीच चर्चा केली नाही. असा निर्णय घेण्यासाठी इतकी घाई का केली जात आहे, अशी विचारणा करतानाच पवार यांनी या निर्णयामागे सुनील तटकरे आणि प्रफुल्ल पटेल असावेत, अशी शंकाही व्यक्त केली.
