मनसेच्या संतोष धुरी यांना तिकीट मिळवण्यात अपयश – वार्ड क्रमांक १९४ मध्ये दोन्ही शिवसेना आमने सामने

मुंबई/शिवसेनेच्या फाटाफुटीनंतर सर्वाधिक संघर्ष पाहायला मिळालेल्या प्रभादेवी-दादर भागातील वॉर्ड क्रमांक १९४ मधील लढाई अखेर ठरली आहे. ठाकरे बंधूंमध्ये या वॉर्डसाठी दोघांच्या निष्ठावंत सैनिकांमध्ये चढाओढ सुरु होती. मनसेचे संतोष धुरी आणि उद्धव ठाकरेंचे आमदार सुनील शिंदे यांचे बंधू निशिकांत शिंदे या वॉर्डसाठी इच्छुक होते. अखेर हा प्रभाग शिवसेनेला सुटला असून, प्रभाग क्रमांक 194 मधून निशिकांत शिंदे हे ठाकरेंच्या शिवसेनेकडून उमेदवार असतील. महत्त्वाचं म्हणजे एकनाथ शिंदे यांच्या शिवसेनेकडून याच वॉर्डचं नेतृत्व समाधान सरवणकर यांनी केलं आहे. त्यामुळे आता ठाकरे आणि शिंदे यांच्या संघर्षात या प्रभागात मुंबईतील सर्वात टफ फाईट पाहायला मिळू शकते.
निशिकांत शिंदे हे ठाकरेंचे विधानपरिषदेचे आमदार सुनील शिंदे यांचे बंधू आहेत. सुनील शिंदे यांनी आदित्य ठाकरेंसाठी आपला वरळी हा मतदारसंघ सोडला होता. त्याचं बक्षीस म्हणून सुनील शिंदेंना शिवसेनेने विधानपरिषदेवर पाठवलं. त्यानंतर आता त्यांच्या भावासाठी वॉर्ड क्रमांक १९४ हा ठाकरे सेनेने आपल्याकडे ठेवला आहे. १९२आणि १९४ प्रभागांमध्ये ठाकरेंची शिवसेना आणि मनसेमध्ये रस्सीखेच सुरू होती. मात्र १९२ प्रभाग मनसेला देण्यात आला असून यशवंत किल्लेदार हे मनसेचे उमेदवार निवडणुकीच्या रिंगणात असतील. तर १९९४ प्रभागामध्ये निशिकांत शिंदे हे ठाकरेंच्या शिवसेनेकडून उमेदवार असतील. दरम्यान, संतोष धुरी हे मनसेचे पहिल्या फळीतील नेत्यांपैकी एक आहेत. मनसेच्या आक्रमक आंदोलनांमध्ये संदीप देशपांडे, अविनाश जाधव, गजानन काळे यांच्यासह संतोष धुरी यांचं नावही घेतलं जातं. फायरब्रँड कार्यकर्त्यासाठी स्वत: राज ठाकरे हे सुद्धा संतोष धुरी यांच्या उमेदवारीसाठी पाठपुरावा करत होते. मात्र हा प्रभाग उद्धव ठाकरे यांच्या शिवसेनेला सुटल्याने संतोष धुरी यांना माघारी घ्यावी लागली. आता त्यांची नाराजी दोन्ही पक्ष कशी दूर करणार हे पाहणं महत्त्वाचं आहे.