लखनऊ/उत्तर प्रदेशच्या बहराईच जिल्ह्यात अवैध मदरसे चालवले जात असल्याचे प्रकार समोर आले आहेत. पयागपूर तहसील पहालवारा गावातील एका तीन मजली इमारतीत सुरु असलेल्या मदरशाची प्रशासकीय पथकानं पाहणी केली. त्यावेळी पथकाला एका शौचालयात ४० अल्पवयीन मुली आढळून आल्या. या सगळ्या मुली शौचालयात लपलेल्या होत्या. त्या ९ ते १४ वर्षे वयोगटातील आहेत. या घटनेनं परिसरात एकच खळबळ उडाली आहे.
जिल्ह्यात अवैध मदरसे चालवले जात असल्याच्या तक्रारी सातत्यानं मिळत होत्या, अशी माहिती एसडीएम अश्विनी कुमार पांडे यांनी दिली. ‘बुधवारी पोलीस दलासोबत पथकानं छापा टाकला. त्यावेळी मदरसा संचालकांनी वर जाण्यापासून रोखण्याचा प्रयत्न केला. यानंतर महिला पोलीस कर्मचाऱ्यांच्या उपस्थितीत गच्चीवर तयार करण्यात आलेल्या शौचालयाचं दार उघडण्यात आलं. तेव्हा तिथे ४० मुली घाबरलेल्या अवस्थेत आढळून आल्या. त्यांच्या चेहऱ्यावर भीती अगदी स्पष्ट दिसत होती. शौचालयाचं दार उघडताच ४० मुली एक-एक करुन बाहेर पडल्या’ असं अश्विनी कुमार पांडे यांनी सांगितलं.पोलिसांनी तपासादरम्यान व्यवस्थापक आणि शिक्षकांकडे नोंदणीशी संबंधित दस्तावेज मागितले. मात्र त्यांना कोणतीही कागदपत्रं सादर करता आली नाहीत. जिल्हा अल्पसंख्याक कल्याण अधिकारी मोहम्मद खालिद यांनी दिलेल्या माहितीनुसार, संबंधित मदरसा गेल्या तीन वर्षांपासून सुरु होता. पण त्याची नोंदणी करण्यात आली नव्हती. २०२३ मध्ये करण्यात आलेल्या सर्वेक्षण अहवालानुसार जिल्ह्यात ४९५ अवैध मदरसे आहेत. मात्र या मदरशाचा समावेश त्या अहवालात नाही.मदरशात आठ खोल्या असताना ४० विद्यार्थिनी एका शौचालयात का लपल्या होत्या, असा प्रश्न चौकशी दरम्यान विचारण्यात आला. त्यावर शिक्षिका तकसीम फातिमा यांनी सारवासारव केली. छापा पडल्यानं गोंधळ उडाला आणि विद्यार्थिनींनी स्वत:ला शौचालयात बंद करुन घेतलं, असं फातिमा यांनी पोलिसांना सांगितलं. प्रशासनानं मदरसा बंद करण्याचे आदेश दिले आहेत. विद्यार्थिनींच्या सुरक्षेसाठी त्यांना त्यांच्या घरी पाठवण्यात आलं आहे. मदरशांची कागदपत्रांची तपासणी सुरु आहे.
