कोची/ महाराष्ट्रासोबतच दक्षिणेतील केरळमध्येही स्थानिक स्वराज्य संस्थांच्या निवडणुका होऊ घातल्या आहेत. निवडणुकीचं तिकीट मिळवण्यासाठी कार्यकर्त्यांमध्ये स्पर्धा लागली आहे. त्यातच राष्ट्रीय स्वयंसेवक संघाच्या एका स्वयंसेवकानं भाजपनं तिकीट न दिल्यानं नाराज होऊन आत्महत्या केली आहे. आनंद के. थंपी असं आत्महत्या केलेल्या स्वयंसेवकाचं नाव आहे. शनिवारी दुपारच्या सुमारास त्याचा मृतदेह राहत्या घरात गळफास घेतलेल्या अवस्थेत सापडला.
तिरुअनंतपुरम परिषदेच्या त्रिक्कणपुरम वॉर्डमधून आनंद थंपी यांना भाजप कडून निवडणूक लढायची होती. भाजप आपल्याला तिकीट देईल, अशी आशा थंपी यांना होती. पण भाजपनं जाहीर केलेल्या उमेदवारांच्या यादीत आपलं नाव नसल्याचं समजताच थंपी निराश झाले होते. मात्र भाजपच्या स्थानिक नेत्यांनी वेगळाच दावा केला आहे. थंपी यांनी आपल्याकडे तिकिटासाठी कधीच संपर्क केला नव्हता, असं भाजपच्या नेत्यांनी सांगितलं. थंपी यांच्या मृत्यूला तिकीट कापण्याशी जोडू नका, असं भाजप नेते सांगत आहेत.भाजपनं जाहीर केलेल्या उमेदवारांच्या यादीत नाव संपल्यानं आनंद थंपी यांनी आपण अपक्ष लढणार असल्याची घोषणा केली होती. थंपी यांनी व्हॉट्स ऍपवरुन त्यांच्या मित्रांवर आरोप केले. जीव देण्यापूर्वी त्यांनी मित्रांना मेसेज पाठवले होते. आपली जगायची इच्छा नसल्याचं त्यात त्यांनी म्हटलं होतं.
