मुंबई/गेल्या काही दिवसांपासून संपूर्ण मुंबईत रस्त्यावर ठाण मांडून बसणाऱ्या फेरीवाल्यांविरोधात पालिकेने कारवाईची तीव्र मोहीम सुरु केली आहे. अनेक भागांमध्ये फेरीवाल्यांना रस्त्यांवर बसून दिले जात नाही. मात्र, पालिकेच्या या कारवाईचा जोर काही दिवसांत आपोआप ओसरेल या भ्रमात असणाऱ्या अनधिकृत फेरीवाल्यांना मोठा झटका बसणार आहे. कारण मुंबई महानगरपालिकेच्या यंदाच्या अर्थसंकल्पात फेरीवाल्यांसाठी नवे धोरण जाहीर करण्यात आले आहे. त्यानुसार आता रस्त्यावर फक्त अधिकृत फेरीवाल्यांनाच आपले दुकान थाटता येणार आहे महायुती सरकारच्या नव्या फेरीवाला धोरणानुसार, अधिकृत फेरीवाल्यांना ओळखण्यासाठी क्यूँ आर कोड आधारित प्रमाणपत्र वितरित केले जाणार आहे. यापुढे मुंबई महापालिका क्षेत्रातील अधिकृत फेरीवाल्यांना क्यूँ आर कोड आधारित प्रमाणपत्र दिले जाईल. तसेच अनधिकृत आणि बांगलादेशी फेरीवाल्यांच्या विरोधातली मोहीम तीव्र होणार आहे. मात्र पालिकेच्या या मोहिमेनंतरही दादर ग्रँट रोड सारख्या भागात काही फेरीवाले दिसत आहेत आणि त्यांना पालिका अधिकाऱ्यांच्या छुपा पाठिंबा असल्याचे समजते.मुंबईतील फेरीवाल्यांकडून पालिका अधिकारी आणि पोलिसांना कोट्यवधी रुपयांचा हप्ता मिळतो असा मुंबईकरांचा आरोप आहे.पण आता कोर्टाच्या निर्णयानंतर पालिका अधिकाऱ्यांचे धाबे दणाणले आहेत आणि म्हणूनच ते फेरीवाल्यांवर कारवाई करीत आहेत.
