| |

पॅरिसमध्ये महागाईविरोधात आंदोलनाला हिंसक वळण;

ByMumbai Jansatta

अनेक शहरांत जाळपोळ, २,००० हून अधिक दुकानांची लुटालूट
पॅरिस:
फ्रान्समध्ये वाढती महागाई आणि सामाजिक समस्यांवरून सुरू असलेल्या निदर्शनांनी अचानक अत्यंत हिंसक रूप धारण केले आहे. राजधानी पॅरिससह लिमोगेस आणि इतर प्रमुख शहरांमध्ये मोठ्या प्रमाणावर जाळपोळ, तोडफोड व सार्वजनिक मालमत्तेची हानी झाली असून संपूर्ण देशात तणावाचे वातावरण निर्माण झाले आहे.
मिळालेल्या माहितीनुसार, उपद्रवी गटांनी रस्त्यावरील कचऱ्याचे डबे, वाहने आणि सायकलींना आगी लावल्या. लिमोगेस शहरात ऐतिहासिक सिटी हॉलला आग लावण्यात आल्याने इमारतीचे छत कोसळले. या हिंसाचारात देशभरातील सुमारे २,००० हून अधिक दुकाने आणि व्यावसायिक प्रतिष्ठानांची तोडफोड करून लुटालूट करण्यात आली आहे.
परिस्थिती हाताबाहेर जात असल्याचे पाहून पोलिसांनी आंदोलकांना पांगवण्यासाठी अश्रुधूर आणि स्टन ग्रेनेड्सचा वापर केला. हिंसाचार रोखण्यासाठी अनेक शहरांमध्ये संध्याकाळची संचारबंदी (Curfew) लागू करण्यात आली असून हजारो आंदोलकांना ताब्यात घेण्यात आले आहे.
या घटनेवर राष्ट्राध्यक्ष इमॅनुएल मॅक्रॉन यांनी तीव्र चिंता व्यक्त केली आहे. “सार्वजनिक सुव्यवस्था आणि कायदा मोडीत काढणाऱ्या उपद्रवींवर कठोर कायदेशीर कारवाई केली जाईल,” असा इशारा सरकारने दिला आहे. सध्या संपूर्ण फ्रान्समध्ये कडक सुरक्षा व्यवस्था तैनात करण्यात आली आहे.

Similar Posts